උණුසුම් ජල වාෂ්ප සහිත සුපිරි පෘතුවියක්….!

GJ1214b සුපිරි පෘතුවිය සිත්තර ඇසින්...Image: David A. Aguilar (CfA).

ජලය සහිත පෘතුවිය මෙන් 7 ගුණයක් ස්කන්ධයක් ඇති ග්‍රහලෝකයක් වටා උණුසුම් ජල වාෂ්ප සහිත වායුගෝලයක් ඇති බව හබල් දුරේක්ෂය මගින් නිරීක්ෂනය කර තිබෙනවා.

GJ 1214b නම් මෙම ග්‍රහලොව මුලින්ම සොයාගනු ලැබූවේ 2009 දී තාරකා භෞතික විද්‍යාව සඳහා වූ හාවඩ්-ස්මිත්සෝනියන් මධ්‍යස්ථානය [Harvard-Smithsonian Center for Astrophysics (CfA)] මගින් දියත් කල භූ ස්ථාපිත MEarth නම් ව්‍යාපෘතියේ විද්‍යාඥයන් පිරිසක් විසිනි.මෙම ග්‍රහලොව අපට ආලෝක වර්ෂ 40 ඈතින් ඔපියුකස් තාරකා රාශිය පසුබිම් කරගෙන ඇති රතු වාමන තරුවක් වටා භ්‍රමණය වෙමින් පවතී.තරුවේ සිට ග්‍රහලොවට දුර කිලෝමීටර මිලියන 2ක් වේ.ග්‍රහලොව මතුපිට උෂ්ණත්වය සෙල්සියස් අංශක 230ක් පමණ වන අතර 2010 දී සිදු කරන ලද නිරීක්ෂනයන් මගින් අනුමාන කෙරුණෙ එහි වායුගෝලය ජල වාෂ්ප වලින් සමන්විත බවයි.කෙසේ නමුත් මෙම ග්‍රහලොව ද්‍රව ජලය නොපැවතීමට තරම් උණුසුම් වේ.

ග්‍රහලොව සිය මවු තරුව ඉදිරියෙන් ගමන් කිරීමේදී හබල් දුරේක්ෂය මගින් එය නිරීක්ෂනය කරමින් ග්‍රහලොවේ සංයුතිය සොයාගෙන ඇත.ග්‍රහලොවේ ව්ෂ්කම්භය පෘතුවිය මෙන් 2.7 ගුණයකි.ඝනත්වය ඝන සෙන්ටීමීටරයට ග්‍රෑම් 2ක් වන අතර පෘතුවියේ ඝනත්වය ඝන සෙන්ටිමීටරයට ග්‍රෑම් 5.5 කි.මේ නිසා පර්යේෂකයන් අනුමාන කරන්නේ මෙම ග්‍රහලොව සතුව පෘතුවියට වඩා ජලය පවතින නමුත් පාෂාණ ඇත්තේ පෘතුවියට වඩා අඩු ප්‍රමාණයක් බවයි.

ග්‍රහලොවේ වායුගෝලය උණුසුම් ජල වාශ්ප වලින් සමන්විත වෙනවා. නමුත් අපි සාමාන්‍යයෙන් බලාපොරොත්තු වන ආකාරයට ග්‍රහලොව ගැඹුරට යන විට ජලය සහිත මුහුදු දැකගත නොහැකියි.ග්‍රහලොව මතුපිට ජලයේ තාපාංකය ඉක්මවූ උෂ්ණත්වයක් ඇතත් එහි ඇති අධික පීඩනය නිසා ජලය ඝන ස්වරූපයකින් පැවතිය හැකි බව විද්‍යාඥයන් අනුමාන කරනවා.

කෙසේ නමුත් මෙම ග්‍රහලොව ගැන පර්යේෂකයන් සතුව ඇත්තේද දළ අදහසක් පමණි.තවදුරටත් සිදුකෙරෙන ඉදිරි පර්යේෂන මගින් මෙම ග්‍රහලොව හා සෞරග්‍රහ මණ්ඩලය පිළිබඳ චිත්‍රය සම්පූර්ණ කරන්නට ඔවුන්ට හැකි වනු ඇති.

Astronomy Now ඇසුරිනි…